Það er komin dama ;) og frænka svakalega stolt

Já hún Signý er búin að eiga, átti dásamlega stúlku í gærkvöldi, 14 merkur og 51 cm. Daman er með mikið dökkt liðað hár og Signýju sýnist glitta í péturssporið hans Viktors  Allt gekk eins og í sögu og mæðgum heilsast vel.

 

 Nú get ég ekki beðið eftir að komast vestur - jafnvel farin að íhuga það að láta mig hafa það að keyra... var víst búin að lýsa því yfir að næst myndi ég fljúga... skilst að það sé ekki hollt fyrir sál loft- og flughræddra. Kemur í ljós.

Við mæðgur létum eins og brjálaðingar í stofunni í gær þegar við fengum fréttirnar.

 Var að tala við Signýju áðan og hún bara horfir á dásemdina og brosir. Tímdi varla að fara í sturtu eftir fæðinguna - vildi fá að hafa hana með.

Meira seinna, Ella bíður eftir myndinni

Alfan

Hellú...

Jæja, sjaldgæfir svartir svanir... nei ég segi svona, bara búin að vera í smá pásu.

Dásamlegustu fréttir dagsins eru þær að Arna Guðbjörg náði skriflega bílprófinu í dag - jibbí. Þá á hún bara eftir að fara í þrjá ökutíma og svo í prófið sjálft... og þá megið þið fara að vara ykkur. Reyndar er hún stórsnjall ökumaður, það er aðallega taugaveiklaða mamman við hliðina á henni sem gerir henni lífið leitt, finnst hún svolítið annars hugar

Um helgina vorum við fyrir sunnan að skíra litla dásamlega rauðhærða riddarann . - JÖKULL - heitir hann, kraftmikið og flott nafn á dásamlegan dreng.

    

Við fórum sem sagt suður á föstudaginn til þess að skíra piltinn og aðstoða smá við undirbúning. Vorum ótrúlega heppnar að fá að passa hann nánast eins og við vildum - ég sagði nánast því það er aldrei of mikið af því dásamlega hlutverki að fá vera pössunarpía

Jökull er farinn að hjala helling og segir heilu og hálfu sögurnar og klagar þess á milli. Hann er sem sagt BARA dásamlegur.

Á föstudaginn þegar við komum var Jói litli fastur í bakinu og Hulda á fullu að undirbúa þannig að við fengum að passa.

Á Laugardaginnvar svo skírnin og stóð hann sig með prýði þar - auðvitað - og var eins og lítil fullorðinn kall þegar Jóna Hrönn prestur hélt honum uppi og talaði til fólksins. Þegar hann kom svo auga á kertislogann festust augun þar og hann varð ákaflega fyndinn á svipinn. Veislan var dásamleg og um kvöldið vorum við boðin í mat til Finnboga og Sessu. Eftir að við komum í íbúðina aftur höfðum við það bara kósý.

Á sunnudaginn fórum við "smá" í búðir og svo í heimsókn í Melalindina og dáðumst enn og aftur og meira að drengnum dásamlega. Spáið í það að eiga svona marga aðdáendur  Fórum svo öll saman út að borða, nema Arna og Pabbi því þau þurfti að vinna og fara í skólaferð á mánudeginum... söknuðum þeirra en það kemur að því að við verðum öll og líklegast einn til viðbótar. Takið eftir EINN, er með smá spá í gangi því ég held að Signý sé með dreng. Viktor heldur sig fast við stelpuna og er búinn að setja umslagið góða hátt hátt upp þannig að það kemur líklegast ekki í ljós fyrr en að þessu öllu kemur - spennandi... Arna og mamma segja líka stelpa en pabbi gefur ekki neitt upp...

Jæja ætla að fara að skríða í háttinn, kannski líður ekki eins langt á milli skrifa núna en lofa engu, Góða nótt vinir, Alfan

 

Nýjustu tölur

Það var svo mikið um að vera í spennunni í gær að það fylgdu engar tölur, en hér kma þær. Þetta er myndar piltur - kippir í kynið - og fæddist hann 17:30, 11.03.08 og er hann 16,5 merkur og 52,5 cm. Hárið er rauðbrúnt og hann er ansi líkur pabbanum, mögulega á mamman munninn en það á eftir að koma betur í ljós þegar þrotinn fer.

  

Sætur ekki satt - ansi nákvæmur bumbusónar

Kv.Alfan

Það er kominn dásamlegur drengur ;)

já Jói litli og Hulda voru að eignast myndar pilt nú í dag. Hann er líka svona dásamlega fallegur. Frænka fékk mynd senda í símann

Guð hvað ég hlakka til að knúsa hann um páskana. Get varla beðið. Langaði líka til að komast suður og knúsa pabbann sem er búinn að standa sig svo vel, alger hetja eins og mamman sem fæddi þennan dásamlega dreng.

jæja búin að montast, kveðja Alfan

Og þá er komin helgi...enn og aftur

Það er skemmtilegt hvað dagarnir eru fljótir að líða. Mögulega er það þessi dásamlega vinna sé ég er í, hver dagurinn líður á fætur öðrum og maður fer sæll inn í helgarnar. Reyndar eru búin að vera talsverð veikindi í leikskólanum en á meðan veikindi barna og fullorðinna fara saman gengur þetta vel, enda frábært fólk að störfum

Arna trommar og trommar og er stefnan að taka eitthvað spennandi upp í næsta trommutíma. Kennarinn er alveg eðall - góð árgerð  -og leyfir henni mikið að spila eftir lögum og heldur hún áfram að æfa sig heima. Það er mjög snjallt af því að það er akkúrat þetta sem Arna hefur svo mikinn áhuga á og byrjaði einmitt þannig í upphafi. Við stefnum á að  gera aukaherbergið að rokkaraherbergi og setja bara lítið skrifborð þar inn - Arna ætlar að teikna það upp og hanna. Þetta er svo snjall krakki sem maður á

Ég ætla að vera dugleg að kanna Feng Shui fræðin og dúllast við að laga til og snurfusa. Það er endalaust gaman að punta í kring um sig í nýja húsinu. Frí frá leikfiminni um helgina þar sem ég var svo dugleg að fara alla dagana í vikunni - húrra fyrir mér. Annars væri alveg dæmigert ef mér dytti í hug að skreppa og toppa þannig sjálfa mig algerlega...

Hlakka svakalega mikið til að hitta Signýju og bumbubúann um miðjann mánuðinn, hef ekki fengið að knúsa kúluna síðan hún fór að birtast. Bara búin að fá eina fettumynd þegar mamman verðandi var að reyna að gera hana sýnilega fyrir mig á mynd.

Jæja best að fara að skanna aukaherbergið og sjá hvernig hægt er að gera það ofurflott rokkaraherbergi

Góða helgi kæru vinir

Alfan

Fyrir Ellu frænku

Já hún Ella frænka er dyggur lesandi og bað um myndir af hekli og prjóni... hér koma myndir handa þér elsku Ella. Komin með einn eina útfáfuna að dúlluteppi og svo er ég búin að gera geggjað gamaldags peysu handa Jóalitla. Signý gefur ekki upp kynið þannig að hún verður bara að bíða... eða bara að fá í hlutlausum lit. Reyni að segja henni  það reglulega hvað það er miklu sniðugra og hentugra að vita kynið  Ekki það að ég sé að deyja úr forvitni neinei

Jæja er ofur kát yfir því að á morgun sé föstudagur því þá er svo afskaplega stutt í laugardag og sunnudag Það er líka svo gaman í vinnunni á föstudögum þegar englarnir syngja á söngfundum. Bara geggjað og ég mæli með því að þið kíkkið við kæru ættingjar og vinir þegar þið eigið leið um á föstudegi - þetta er geggjuð upplifun.

Hér eru myndi af nýjasta teppinu og svo geggjað gamaldags peysunni

  

over and out, Alfan

jæja kæru vinir nú skal segja ykkur sögu, sem að eitt sinn gerðist...

nei ég segi svona, engin saga en nokkuð sem hefur á daga okkar drifið.

Mamman vinnur, borðar, fer í leikfimi og sefur. Barnið er í skólanum og sefur - kannski smá ýkjur því hún er líka að læra, hitta vini, tromma og er farin að elta mömmu í leikfimina, bara gott mál. Svo er hún núna á Dale Carniegi námskeiði sem ég tel eina bestu fjárfestingu sem ég hef gert fyrir okkur báðar. Fyrir ári síðan fór ég á svona námskeið og sá strax að þetta var það sem AGM þyrfti og hún var til þegar námskeiðið var auglýst hérna. Mér finnst hún vera að blómstra og fær gríðarlega útrás í trommunum líka þannig að það var líka góð hugmynd :) Ég hef reyndar mjög gaman að því að hlusta á hana, ólíkt því sem margir halda... að maður verði geðveikur á að hlusta á trommuslátt innanhúss, aldeilis ekki hjá svona snjöllum krakka.

Annars hef ég verið að kynna mér Feng Shui og er í góðum hóp sem var með mér á tveimur námskeiðum, annað í október og svo núna í febrúar var framhald. Eins fékk ég kennarann til að koma heim og kíkja á húsið og fór hún með prjóna í herbergið mitt því ég hef verið að sofa skringilega og enda alltaf á ská í rúminu. Hún fann skýringu, það liggur slæmur orkustrengur ská yfir rúmið mitt og kemur hann úr nágrannagarðinum og nágrannahúsinu. Nú þarf ég að fá mér góðar þykkar gardínur og ætla líka að fá mér filmu í 3/4 af glugganum því það sést beint inn í herbergið  mitt af reykingarsvæði nágrannana - langar ekkert sérstaklega að vera alltaf með dregið fyrir til þess að þau séu ekki að góna inn til mín. Það verður bara fínt að fá filmu og fá svo birtu inn fyrir ofan hana. Það er svo ótrúlegt hvað hægt er að fá flottar filmur og er ég svo heppin að tvær úr Feng Shui hópnum eru að vinna hjá Stíl og ætlum við að búa eitthvað flott munstur til - snjallt ekki satt :)

Leikfimin gengur ágætlega, hægt og sígandi eins og sagt er. Þetta er sko hörku púl og elska ég það að fara svo heim í sturtu, í kósý föt og sitja svo með hekl eða prjón - þið munið að ég er að verða tvöföld frænka :) - og horfa á sjónvarpið. Hin kvöldin reyni ég að gera eitthvað meira og gáfulegra og tekst það nú bara ágætlega hehe.

Kíki annað slagið yfir í heiði og þar eru hlutirnir sko að gerast, alltaf eitthvað búið að gera á milli heimsókna. Annars líkar mér það ákaflega vel að ná Gösp í afslöppun og náðum við því í síðustu viku að hanga saman við sjónvarpið - duglegar ekki satt.

Reyndar er ég ekki í alveg nógu góðum málum því við Guðrún erum í keppni hvor tæmir "söfnunarstaðinn" á undan. Hún tróð inn á verðandi baðherbergi og ég inn í aukaherbergið. Búin að setja mér markmið nokkru sinnum að klára málið en... alltaf einhverjar afsakanir. Nú langar mig bara að gera flott rokkaraherbergi þar handa prinsessunni. Tekur örugglega vel í það - finnst herbergið sitt aðeins of lítið en það eru tvö í boði þannig að hún getur ekki kvartað neitt daman.

Mamma kíkir annað slagið og tékkar á framleiðslunni og kemur og ber sína undir mig. Var að klára geggjað krúttlegar buxur á Jóalitla.

Um síðustu helgi fengum við að passa hana Örnu Karen ofurkrútt á meðan mamma hennar og pabbi fóru í afmæli. Það var nú ekki mikið mál enda eðal barn þar á ferð - frábærar þessar Örnur Axel Brynjar bróðir Örnu Guðbjargar og Yrsa (hundur pappa þeirra) fengu líka að vera og var það líka gaman, ægilega stillt öll sömul.

  

Svo var ég að frétta af síðu hjá Jóalitla og er að reyna að komast inn á hana en barnalandið liggur niðri eins og er - alveg týpískt - gengur bara betur næst :)

Jæja nú er komið nóg í bili, ætla að vinna í því að koma inn myndum af húsinu með mínum húsgögnum, tók nokkrar fyrir Feng Shui námskeiðið þannig að þar sló ég tvær flugur í einu höggi, fyrir námseiðið og síðuna.

BBÍB (bless bless í bili), Alfan

P.s. Arna Guðbjörk keypti sér poppvél - og hún elskar hana. Reyndar hélt ég að hún væri algerlega ð missa sig þegar hún poppaði fyrst því hún hló eins og bjáni henni fannst svo fyndið að horfá á einn og einn mais poppast - fyndinn og pínu skrýtinn krakki :)

Vúhú hélduð þið að ég væri hætt...hehe... nei sko aldeilis ekki!!!!

Margt hefur á daga okkar drifið og fóru jólin einstaklega vel í okkur. Reyndar var ég lasin blá jólin en það  þýddi bara það að ég kom léttari undan þeim og fékk fyrir það hamingjuóskir frá þjálfa...

Fyrstu jólin okkar hér í Rauðu voru dásamleg og það er ótrúlegt hvað mér finnst ég eiga heima hér og að ég hafi aldrei átt heima nein staðar annarstaðar. Ég ákvað að bjóða tveimur systkinum ömmu sem bjuggu hér í smá jólaboð og var ótrúlega gaman að heyra frá gömlu dögunum  Auður átti tvö börn í herberginu sem Arna er í og Steini gat frætt mig um hver var í hvað herbergi og hvaða breytingar væri búið að gera og nokkurn vegin hver gerði hvað. Sagði okkur einnig nokkrar skrautlegar sögur af sér og nágrönnum sínum. T.d. sagði hann okkur frá nágranna sem var að smíða og saga fram eftir nóttu og eina nóttina fékk hann nóg og stökk út um gluggann á svefnherberginu... á brókinni. Já hann Steini er sko ekkert blávatn Það var ákaflega gaman að fá þau í heimsókn og hafði Auður ekkert komið inn í húsið síðan það  var gert upp. Rifjaði hún upp þegar jólabakstur var í gangi og þá þurfti að labba tvær tröppur niður í þvottahúsið - vanda verk og stundum var dottið með plöturnar og þá varð sorg.

 

 

Hnota dúllaði sér aðallega við að kúra og drekka úr jólatrésskálinni... já hún er nú svolítið skrýtin en þannig elskum við hana líka  Varð voða flóttaleg þegar hún var nöppuð...

 

Það var yndislegt að hitta Jóa litla og Huldu og fá að sjá bumbuna flottu. Frosti sjarmaði líka alla - sko nema Loka litla sem urraði bara á hann. Þeir voru bara hafðir á sinni hvorri hæðinni og skipt út á nokkurra tíma fresti. Þau skötuhjúin voru yfir jólin og fóru suður 28. des. Daginn áður komu vestfirðingarnir - eftir 9 tíma keyrslu - og voru fram á nýja árið. Geðveikt að hafa þetta lið sem maður saknar nánast daglega. Reyndar kom Signý systir sinni til að grenja á aðfangadagskvöld - fárveikri systir sinni - hún tilkynnti sem sagt fjölgun í fjölskyldunni og er ég enn að tárast yfir því þegar ég hugsa um það. Mamma náttúrulega að farast úr hamingjustolti og ansi stutt í brosið hjá pabba þegar þetta er nefnt.

 

  

 

Nú verður frænka samt að fara að láta hendur standa fram úr ermum... já ég er að verða tvöföld frænka, móðursystir og föðursystir... ekki amalegt það. Ég er búin með eina drengjapeysu en næsta verður að vera í hlutlausum lit .

Nú fer prófalestri að ljúka hér, nánar tiltekið á miðvikudaginn. Þetta er búið að taka aðeins á taugarnar - aðallega hjá mér - unglingurinn rólegri. Svo á útkoman bara eftir að koma í ljós. Hún hefur aldrei verið eins dugleg að finna sér hin ýmsu verkefni - þó ekki heimilisverk... - og er hún t.d. þessa stundina að mála. Búin með fimm verk á þremur dögum... Það er hægt að fá útrás á ýmsan hátt og hún málar og málar - rétt eins og mamman þegar hún á erfiða tíma. Kippir í kynið.

 

  

Stefnan tekin á borgina á laugardaginn fram á þriðjudag en ég er að fara suður á fund og fínt að nýta farið sem Hjallastefnan borgar undir mig - prinsessurassinn  Fékk svo 5500 kr. fargjald fyrir krúttið mitt.

Já talandi um krútt þá fékk hún trommur í jólagjöf... já það vorum við foreldrarnir sem gáfum henni það... sjálfviljug... Það er ótrúlega frábært að sjá hana fara inn í herbergi og hamast og koma svo slaka og káta út - búin að fá útrás. Þetta er alls ekki slæmt og nágrannarnir hafa ekki kvartað enn.

 

  

  

 

  

Við höfum verið að kíkka í sveitina annað slagið og ekkert smá gaman að fylgjast með framvindu mála þar á bæ. Öll jólin sá maður stöku innréttingu bætast í eldhúsið og innstungur sem voru orðnar ansi nauðsynlegar. Drengirnir búnir að koma sér vel fyrir og prinsessan í prinsessuhlíð einnig og búin að prófa allskyns breytingar og veit maður aldrei hvernig herbergið snýr næst þegar maður kemur - spennandi. Stíllinn samt kominn sem er hvítt, grátt og svart. Leikloftið að virka vel þar á bæ og stelst Bjarkalingur annað slagið til þess að sofa þar, lætur mömmu og pabba bara ekki vita að hann er farinn að sofa svo þau geti ekki bannað það - utan við sig hvað... hann veit sko lengra en nef hans nær

Jæja nóg í bili - sjáum til hvenær ég blogga næst...

Kv.Alfan

Komin úr borginni... hmm hvað veskið þynntist...

Jæja þá erum við mæðgur komnar úr góðri borgarferð. Þetta var sambland af vinnuferð og skemmtiferð og fjölskylduferð. Gott að slá margar flugur í einu höggi

Við flugum suður á fimmtudagsmorgun og tveimur tímum síðar var Guðbjörgin búin með kvótann sinn og brosti sínu blíðasta þegar hún sótti um aukningu... 

Seinnipartinn á fimmtudaginn fór ég svo á fyrirlestur með Eddu Björgvins, Húmor í stjórnun. Þetta var mjög skemmtilegt og gaman að hlusta á hana.  

Um kvöldið kíktum við svo á Jóa og co. þegar þau voru búin á námskeiði með Frosta "litla". Það var gaman að sjá þau og þegar ég knúsaði Huldu mætti ég bara fyrirstöðu, kúlan farin að stækka, ekkert smá krúttlegt. Þau voru hress og kát, búin að kaupa kommóðu-skiptiborð fyrir krílið og farin að máta allt inn í litlu íbúðina. Frosti kominn með einkaherbergi, geymsluna, og búinn að læra "fara í herbergið" og skríður þá inn í búrið í geymslunni og sest þar. Hann er ákaflega flottur hundur og gengur rosalega vel með hann, gaman að sjá þegar hann verður "stóri" og hvort hann verði abbó. Annars er hann voða vinnumaður með Jóa í vinnunni, munar miklu og sést vel að hann er hændur að Jóa sínum. Var með smá gestastæla við okkur og fannst gott að sleikja táfýluna mína og þurfti ég ekkert a skipta um sokka þann daginn... eða þannig.

Á föstudeginum var ég á starfsdegi og svaf frökenin á sínu græna í Bakkavörinni - svítunni okkar - og fór af stað upp úr hádegi. Fór svo á Laugarveginn og náði að eyða nokkrum þúsundköllum þar. Við hittumst svo um hálf fjögur og fórum í nokkrar búðir og fengum okkur MacDonalds  Dúlluðum okkur um kvöldið og nenntum ekki í neinar heimsóknir, gerum það bara næst.

Á laugardeginum fórum við svo smá í Kringluna. Um tvö tékkuðum við mig inn á hótelið - HILTON - takið eftir. Já hún Magga Pála var svo grand á því að utanbæjarfólkið fékk að gista á hótelinu (smá uppbót fyrir að sitja í rútu að norðan og hem aftur). Arna Guðbjörg missti sig aðeins og myndaði og myndaði. Horfði svo sínum fallegu augum á mig þangað til ég skildi hana... langaði ekki að gista hjá pabbanum eins og til stóð. Ég var ein í herbergi og með tvöfalt rúm... auðvitað fékk hún að gista, ekki á hverjum degi sem HILTON er í boði hehe. Fór til pabbans um kvöldið og hann skutlaði henni svo á miðnætti og hún dúllaði sér uppi á herbergi þar til ég kom af árshátíðinni. Það var ákaflega gaman á árshátíðinni, góður matur og frábær félagsskapur. Það var svo góð mæting frá Hólmasól og gaman að kynnast mökum nýja starfsfólksins. Það er einstaklega lukkulegt að vinna í svona frábærum starfsmannahóp, það er sko ekki gefið að vera svo heppinn.

Sváfum fram til tíu á sunnudag og fengum MORGUNMAT Í RÚMIÐ. Stóðst ekki freistinguna að bjóða upp á það og var einstaklega gaman að sitja uppi í rúmi og snæða morgunmat. Fíluðum okkur eins og í bíómynd. Settumst upp í rútu á hádegi og vorum komnar heim undir kvöldmat. Dúlluðum okkur við að taka upp úr töskum og njóta lífsins í nýja húsinu. Hnota náttúrulega komin með saknaðarstælana og nuddar sér og vælir utan í okkur. Gengur vonandi yfir á 2-3 dögum eins og venjulaga. Sefur vafalaust á öðrum hvorum koddanum í nótt... ótrúlega uppáþrengjandi.

Ég gleymdi nú að nefna það að ég náði auðvitað líka að eyða svolitlu í borginni. Keypti pæjuskó, tvær peysur, úlpu og bol. Afbragðs árangur fyrir mig...

Till later, Alfan

 

Jæja þá er enn og aftur komið að smá rapporti

Margt hefur á daga okkar mæðgna drifið undanfarið. Arna Guðbjörg er komin með spangir í munninn og kostar það nú sitt. Hún var svolítið aum fyrstu dagana en mjög dugleg og kvartaði eigi svo mikið. Nú eru þær vinkonurnar eins, báðar með teina. Katrín er búin að vera með sína aðeins lengur og því vanari og gefur góð ráð  Þegar ég fór að borga og sagði tannsa frá verkjunum sagði hann bara "já beuty is pain..." og ef ég hefði þekkt hann betur hefði ég nú bara svarað honum "I know" og skvetta árinu aftur hehe, alltaf svo fyndin...

Annars lét ég nú verða að því á miðvikudaginn að fara í klippingu til Sólrúnar á Samson og gerðum við smá tilraun. Já ég lét hafa mig út í tilraun góðu gestir. Nú er ég komin með fæðingarlitinn á hausinn, kastaníubrúnt, en með nokkrar orange strípur - til að fá effekt eins og Sólrún sagði  Það flaug ansi mikið af lokkum í gólfið og endaði ég ansi stutt og er það að venjast. Hollt og gott að klippa rækilega annað slagið.

Annars fór ég líka á Feng Shui námskeið um daginn og það var GEÐVEIKT gaman. Það er ótrúlega gaman að spá í þessi fræði og grúska hvað hægt er að gera við umhverfi sitt þannig að allt fúnkeri betur. Í næstu viku ætlar hópurinn svo að koma til mín og við að fara saman yfir að sem við lærðum. Hlakka mikið til.

Dagurinn í dag fór í það að þrífa hátt og lágt, ekkert mál í fína flotta húsinu mínu  Endaði úti að taka gluggana í gegn, mikilvægt atriði í Feng Shui að hafa glugga hreina. Ég er að vísu alger gluggaþvottarfíkill, finnst algerlega nauðsynlegt á björtum dögum að hafa gluggana hreina. Er með á dagskrá að útbúa mjóa sköfu til að taka opnanlegu fögin, gekk pínu illa því ég náði ekki efst upp á þá. Mjög nauðsynlegt að eiga góðar gluggagræjur

Það fór reyndar ekki mikið fyrir hjálp frá prinsessunni á bænum - hún á sér nefnilega líf... og það var semsagt það að liggja inni í rúmi og horfa á mynd í flakkaranum... ja misjafn er mat manna...

Jæja mamma er á leiðinni yfir, röltir þetta kellingin, og ætla að fá lit í augabrúnir. Dregur pabba með sér til að setja upp eitt ljós eða svo.

Vek athygli á því að Signý systir er komin í bloggheima - veit reyndar ekki með röggsemina en ágætt fyrir mig að það sé einhver bloggari lélegri en ég í bloggeríi  Það verður gaman að fylgjast með henni og framkvæmdunum hjá þeim. Ótrúlega skrýtið að hafa aldrei komið á staðinn þar sem hún er að byggja og brasast. Kemur vonandi að því fljótlega þó vetur konungur sé í nánd.

Over and out, Alfan